ہوم / پنجابی پیج / قمر زماناں آپنی بھو گے۔۔۔۔۔۔۔۔

قمر زماناں آپنی بھو گے۔۔۔۔۔۔۔۔

قمر الزمان پنجابی بولی دے نرے پرے پرچارک ای نئیں نیں۔ پنجابی اینہاں دی ہڈ ورتی ہو کے اینہاں دے ساہیں ساہ لیندی اے۔
گلیں باتیں وی سوچیں پا دیندے نیں پر "بولیاں” تے لخدے نئیں ماردے نیں۔ پنجابی نظم، غزل وی اینہاں دی سوادی ہندی اے پر بولی دی تے اخیر کردے نیں۔ اینہاں دے اندر گھجھ کے نکلی بولی وی سنئیے تے گھجھی مار دیندی اے۔
میں کی آکھاں۔۔۔۔تسی آپ سنو تے فیر دسو۔
اج آئینہ ابصار دے پنجابی دے پیج دے اسیں اینہاں نوں جی آیاں نوں کہندے آں تے ہور چوہنھ دناں وچ ایہہ آپ ایس پیج دے مکھیا ہون دے۔ اللہ اینہاں دی عمر تے صحت اچ برکت رکھے۔ ایس لئی وی قیمتی وجود نیں جے ہور زباناں دا وی بھرواں ذوق رکھدے نیں۔
اج میں اینہاں دی اک غزل پنجابی تے کجھ بولیاں پیش کر رہیاں۔ ونگی
آسطے۔۔۔۔اگوں تسیں جانو تے ایہہ جانن۔(طاہر احمد بھٹی)

بولیاں

پندھ مکدا نظر نہیوں آوندا
وے میٹرو چلان والیا۔۔۔۔!

ساڈی ہوند نوں چٹ دی جاوے،
نیں زر دی زبان اوتری۔۔۔۔!

اساں مڑ کے بہشتیں جانا،
نی کنکے دا سٹا پھڑ کے!

راہ ڈک لئے بلوری برفاں ،
تے فیر میری اکھ ٹر پئی!

خورے اوہدی بھکھ مر جائے
توں روٹیاں فریم کر لے۔۔!

گوری کھچ کے پراندے وچوں دھاگا
تے رات نال ویر پا لیا۔۔۔!

جدوں ترنے دا ول سانوں آیا،
تے فیر ساڈی پھول مک گئی!

بند کلیاں نوں مار گئے اوہلے
جدوں دیاں پھُل بنیاں۔۔۔۔!

تے ہن سنو غزل۔۔۔۔۔

اک تے سمجھاں پُٹھیاں سن
اُتوں کنکاں پھُٹیاں سن

اکھ سنبھالا کسراں کردی
دید سکولوں چھٹیاں سن

بھاویں جثہ پھٹڑ سی،
کم تے پیڑاں جُٹیاں سن

کرکے صبر مصیبت تے
رب تے ڈوراں سُٹیاں سن

کیہ کہنا سی سجن نوں
ہاواں دل وچ گُھٹیاں سن

اوہی پیڑ پچاوے گا
جنھے موجاں لُٹیاں سن

سچ کہناں واں، شاعر نہیں
میں تے لیکاں کٹیاں سن

راہ منزل تے اپڑن لئی
کنیاں جتیاں ٹٹیاں سن

(قمرالزمان۔ اسلام آباد۔ پاکستان)

مصنف طاہر بھٹی

Check Also

غزل۔۔۔۔۔۔۔۔رشید ندیم، کینیڈا

غزل ہوا رہے گی مرا نقشِ پا نہیں رہنا مجھے خبر ہے مرے بعد کیا

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Send this to friend