کیہ یار اساڈا جیونا اسیں کچی برف دے بھور
سانوں چھمکاں سورج ماردا سانوں کردی رات ٹکور

کل پی کے ساہ تریل دے ہوئی الہڑ دھپ جوان
اج واہ کے بودا چِیرواں کیوں پئے گئی میرے کھور

میں اکھ نوں جھُونے مار کے جد ڈھاہ لے پکے نِیر
ایہہ پہلا پھل سی ہجر دا سجناں ول دتا ٹور

میں یار پرانی بوسکی میری بھُگی ہک ہک تند
اس تکیا جدوں سنوار کےمیں ہوگئی نویں نکور

جئیں لُٹیا ڈیوے بال کے مینوں سجنو چِٹے دینہہ
اوہ ڈھاکے چڑھ کے رات دے اج مینوں آکھے چور

ایوب کموکا

Sponsers